You are here
Home > Zabava - Zanimljivosti > “Kako je nekad dela Facebook” (štoriji po domoće – Anđelika Licul, Mirea Franković, Rea Žigant)

“Kako je nekad dela Facebook” (štoriji po domoće – Anđelika Licul, Mirea Franković, Rea Žigant)

Nekad je se bilo drugošlje nego denas, moremo čut od seh starijeh. A udeka morete i pročitat neke štoriji ke su nan gonale naše materi i noni.

Štorija od materi Anđelike Licul:

“Pred 60 let ni bilo telefoni po selah okole Kršana. Đornal se kupiva va Labine, a do tamo si moga samo s kovaricu, kurjeru ka je sako jutro peljala kovari na delo i pokle hi tornivala z dela.

Ta sejna kovarica nosila je novitodi od Potpićna, preko Kršana, do Labina i tako nazad.  Tako je do Mariji z Boljević prišla grda novitod da je umrla njena teta  Nina va Potpićne.  Nina ni bila joko stara, malo je bila znemljena zadnje vreme, ali jedini ni misli da će tako brzo portit. Jedinega se ni moglo zvat, jedini ni pridiva preko kampanji i va Marijini kuće su se važgale kandeli za pokojnu Ninu. Marija je preko sejne kovarice drugo jutro ordinala đerlondu i to najveću, jer će fameja po đerlonde kapit koliko se štimala pokojna teta. Vituri ni bilo, Marija je čekala da njena nuka pride z školi poli Lazarić. Mola je pojala kafe i kruha, nona je stavila crni facol, najbolje škarpeti va boršelin, a cavati na nogi za put, crnu halju ka je vonjala po naftaline i te dve sirote su portile va Potpićon.

Malo pomalo, kamo god su pasale, si su doznali da je Nina umrla, magari se ni culo da je bila bolna. Poli sake kapelice se trebalo pomolit, magari tako su malo i odahnule i malo pomalo prišle su do pokojne teti. Đerlondu su namestile, Marija je kambjala postoli, plakat su počele već dvesto metar prvo kući da hi si cuju, a kada su prišle do kući,……………. Teta va vrte kopo kumpir.

Marija, kamo reš tako zakrabljuna z đerlondu narucalj? Ca je ki umra.?. Vero Nina ti; još cera, su pravili na kovarice. Ca si se znemila, ki bi kumpir danas zagarnu.

Ma znoš ca, hći moja, dobro da si prišla. Naša suseda se danas ženi za onega tovara od Tupljaka. Ona je joko prova, a on blago leno. Sirota ni mogla ni rožice noć koliko je mraz se potuka. Ćemo poskus tu tvoju đerlondu i joj storit jedon lepi buket za ženitvu. Boh ti do zdrovlja Marija, ti si seh kontentala, mene si oživela, a tovor Tilio će emet mlodu z velen buketon rožic pred oltoron.

E da je tako poli nas danas va 2017. lete. Mi preko facebooka kad stavimo nešto grdo još više gledamo da bude grdo, ko te zakopoju da te još više dole pretisnu, a oni su pred 60 let i va tako grden rivali obrnut na dobro i lepo. Ki je tu tovor baš je za zamislit se?!”

 

Štorija od noni Miree Franković:

“Kad son bila mića živela son poli Veli Golji. Va školo son do cetrtega razreda hodila Goljen , a va peti son morala poć va Sveti Martin. Tamo smo morali hodit hodeć ošto ni bilo korjeri ka peljo deca. Jutro smo sejno znali cekat korjero ka je peljala delovci. Ku je bi ka dobar biljetario nas je zi, ali bilo je anke poredneh ki nas neso uteli zet ko ne plotimo. Beci nesmo imeli, tako smo morali poć preko boska teceć da bimo rivali na vrime. Ni nan bilo vajka lahko perke je bilo i grdega vremena. Kad je bi snih jedva se hodilo. Padali smo va neke valice za keh nesmo znali osto se od snega neso videle. Cuda puti smo va školo prišli mokri, neki put se nanke nismo rivali osušit dokle smo šli doma. Toliko lit je pasalo, ali koko da je bilo cera. Pamto se dobri ljudi, ali vero ne zobi se nikad ni oki ki so bili poredni. Deca to nikad ne zobe.”
 Štorija od noni Ree Žigant:

“Prvo nego ca son dobila delo va kove, son morala zračunat račun dug pet metri. I to se na ruke mola moja, a ne ko ti danas, zames onaj vrah va ruke i se ti zračuno. Tanto mi smo onda znali štabelo računat. Znos na kraji son zračunala i dobila delo. Pot kovu son dela 35 let ko financijski deretor. Mi je bilo joko lepo, me je pjezalo to delat. Va kancelariji smo bile some ženske, smo si bile joko dobre. Ma su lepa bila ta vremena.”

 
Top