You are here
Home > Zabava - Zanimljivosti > Najlepci zajik na celen svete

Najlepci zajik na celen svete

Va cetrtak, 21. sicnja je bi don Materinjega zajika. Naša cakavica je zajik ka bi cela Istra trebala znat govrit. Puno njih ga va našen kroje govore, ma ca me propijo dešpero je da se se manje gona po domoće. Naši stori su prvo samo nonjen gonali, a sada vade nas mlaji. Zajik za kega son penso da se besedi znon, ali son trdo žbaljo. Jer ono ca ja znon ni nanke kvarat tega ca postoji. Danošnji problem je da se slabo govori nonjen i zonjega. Penson da ga saken dneve više ni. Da se ne bi zgubi naše labinske pjesnikinje nonjen pišu poezijo ka te va dušo tiko. Kad prištivaju svoju poeziju, jušto moreš besedi va glove proživet.

Ja hi seh folin, ali onaista ku ja najviše cenin koko pjesnika je Rina Miletić. Njeni litrati koko da su anđeli pisali i Bogu povidali. Lepo kad je cuješ govrit, te srhi pasojo. Šinjora ka samo lepo ti zno reć, a vajk ti radi pomoć. Želin nji puno zdrovlja, još puno litrati i se drugo će prić somo. Drugi pjesnici ki su još za spomenut su Bruna Gobo, Neda Milenkovski, Ornela Gergorić, Miranda Šaklamera Verbanac, Valentina Načinović, Đulija Miletić, Teodor Gobo i puno drugeh.  

Za pofolit je i ono ca naš grod i Knjižnica organizojo sako leto “Ca je Ča” i “Ćakulodo na torijone” jer tako se si ljudi dotakno s cakavico. Cuje se naša beseda i lepi litrati.

Ali zoc se se manje gona po domoće? 

  • škola ne vadi dico govrit ku ne hrvoski, po domoće koko da je zabronjeno
  • gledamo va telefoni kade je se na enleški ili hrvocki i i nanke ne obadujemo svoj zajik
  • ki nima noneti i none nima od kega navadit govrit.

Penson da bi se ta problem moga maknut, ali za se treba imet volju i želju.

Ca bi se moglo storit:

  • va školo bi se trebala uves Labinjonska cakavica, ku vodi profesor/ica s oveh kraji, ka zno govorit i ka bi delala kakovi projekti po domoće z decami
  • mogla bi se storit aplikacija na cakavice, da se more vadit zajik
  • trebalo bi se poticat dico da govore doma na cakavice
  • i prvo sega bi trebalo roditelji navadit govrit, ki ne zno

Za kraj ću reć, da je zome cakavica bitna i da je jiman joko radi. Gljedat ću je vajka gonat i anke navadit preteli i seh oko sebe. Moramo vajka imet na mente da moramo tendit svoje, domoće i istrijonsko.

 
Top